ဘီယာဗိုက်အကြောင်း အမှန်တရားများ

View previous topic View next topic Go down

ဘီယာဗိုက်အကြောင်း အမှန်တရားများ

Post  Admin on Fri Jun 17, 2011 12:00 am

သင်ဟာ ဘီယာကို နှစ်ပေါင်းများစွာ သောက်သုံးခဲ့လို့ ယခုတော့ သင့်ရဲ့ ဗိုက်ဟာ စည်ပိုင်းလေးလို ပူနေပြီလား။ သင်ဟာ ဒီလို “ဘီယာဗိုက်” ပိုင်ရှင် ဖြစ်နေခဲ့ပြီ ဆိုရင် သေချာတာ တစ်ခုက သင်တစ်ယောက်တည်း မဟုတ်ပါဘူး ဆိုတာပါပဲ။ ကမ္ဘာပေါ်မှာ ရှိသမျှ ဘီယာစွဲစွဲမြဲမြဲ သောက်သုံးသူတွေဟာ အချိန်ကြာလာတာနဲ့ အမျှ ဗိုက်ရွှဲလာဖို့ သေချာပါတယ်။ အထူးသဖြင့် ယောက်ျားတွေက ဘီယာသောက်တာချင်း အတူတူ မိန်းမတွေထက် ပိုဗိုက်ရွှဲကြကြောင်း သိရပါတယ်။

ဘီယာဗိုက်လို ဗိုက်ရွှဲရွှဲဟာ ဘီယာကြောင့်ပဲ ဖြစ်ရတာလား ??? ဘီယာသောက်သူတိုင်းမှာ ဘီယာဗိုက် မရှိကြသလို တချို့ အားကစားသမားတွေဟာလဲ အသက်အရွယ် နည်းနည်းလေး ရလာရုံနဲ့ အရမ်းဗိုက်ပူ တတ်ကြပါတယ်။ ဒါဆို ဘယ်အရာက အမျိုးသားအများစုနဲ့ အမျိုးသမီးအချို့ကို ဗိုက်ရွှဲစေတာ ပါလိမ့်။

အဖြေက ရှင်းပါတယ်။ သင့်ရဲ့ သေသပ်ချပ်ရပ်တဲ့ ခါးကို ဘောင်းဘီရှေ့မှာ ပူထွက်လာစေတာ ဘီယာ တစ်ခုတည်းကြောင့် မဟုတ်ဘဲ ကယ်လိုရီတွေ များများ စားလို့ ဖြစ်ပါတယ်။ နေ့စဉ်စားလိုက်တဲ့ အစားအသောက်တွေထဲမှာ ပါတဲ့ ကယ်လိုရီ ဆိုတဲ့ စွမ်းအင်ပမာဏထက် အဆမတန် လှုပ်ရှားမှုနည်းရင် ဗိုက်မှာ အဆီစုလာမှာ သေချာပါတယ်။ ကယ်လိုရီမြင့်တဲ့ အစားအသောက်များ ဖြစ်တဲ့ အရက်၊ သကြားပါသော အချိုရည်များ၊ ကစီဓာတ်နဲ့ အဆီဓာတ်ပေါ် အခြေခံထားတဲ့ အစားအသောက်များ (အမြည်း) စတာတွေအားလုံးဟာ သင့်ကို ဗိုက်ရွှဲစေပါလိမ့်မယ်။ ဘီယာတစ်ခုတည်းကြောင့် ဗိုက်ရွှဲတာတော့ မဟုတ်ပါဘူး။

“ယေဘုယျသဘော ပြောရရင် ဘီယာပဲဖြစ်ဖြစ် အရက်ပဲဖြစ်ဖြစ် သောက်တဲ့သူများဟာ ခါးတုတ်လာဖို့ သေချာပါတယ်။ ဘာကြောင့်လဲ ဆိုတော့ အသည်းက ကယ်လိုရီများများကို ဘီယာတွေ အရက်တွေထဲမှာ ပါနေတဲ့ အယ်လ်ကိုဟောဆီကနေ ရတဲ့ အတွက် ခန္ဓာကိုယ်ထဲက အဆီတွေကို ချေဖျက်ခြင်း မလုပ်တော့လို့ ဖြစ်ပါတယ်” လို့ အင်ဒိုခရိုင်းပါရဂူ နဲ့ အ၀လွန်မှု သုတေသီ တစ်ဦးဖြစ်သူ ဒေါက်တာ Michael Jensen က ရှင်းပြပါတယ်။

ပုံမှန် ဘီယာ တစ်ခွက်မှာ ကယ်လိုရီ ၁၅၀ လောက်ပါပါတယ်။ လူတစ်ယောက်ဟာ (အလုပ်ကြမ်းသမား မဟုတ်ရင်) တစ်နေ့လုံး ပုံမှန် သွားလာလှုပ်ရှားဖို့ ကယ်လိုရီ ၃၀၀၀ ကနေ ၄၀၀၀ ကြားရရင်ပဲ လုံလောက်နေတာမို့ ဘီယာသောက်ရင် သင်တစ်ထိုင်ထဲ ဘယ်နှခွက်လောက် သောက်သလဲ တွက်ကြည့်ပါဦး။ သေချာတာကတော့ ကယ်လိုရီတွေကို အ၀င်နဲ့ အထွက် မမျှတစေတော့ပဲ overload ဖြစ်စေမှာ ပါပဲ။

နောက်တစ်ချက်က ဘီယာနဲ့မြည်းတဲ့ အစားအသောက်တွေ ကြောင့်လည်း ပါပါတယ်။ အယ်လ်ကိုဟောဟာ သင့်ကို ခံတွင်းကောင်းကောင်း လိုက်စေတော့ သောက်ထားတဲ့အချိန်မှာ စားကောင်း နေတတ်တာမို့ ပုံမှန်အချိန်ထက် ပိုဝင်တတ်ပါတယ်။ ဒါ့အပြင် ဘီယာနဲ့ မြည်းဖို့ ဆိုင်တွေမှာ ရောင်းတဲ့ စားစရာတွေကလည်း ပီဇာ၊ အာလူးကြော်၊ တောင်ပံအကြွပ်ကြော် စတဲ့ ကယ်လိုရီများတဲ့ ဆီကြော်မုန့်တွေ ဖြစ်နေတတ်လို့ပါပဲ။

ကျန်းမာရေး အန္တရာယ် နည်းအောင် ဘယ်လို သောက်မလဲ ???
ကျွန်တော်လဲ ဘီယာကြိုက်သူတစ်ယောက် ပါပဲ။ ဒါကြောင့် ဒီနေရာမှာ အကြံပြုလိုတာက ဘီယာသောက်ရင် တတ်နိုင်သမျှ ဆီကြော်မုန့် တစ်မျိုးလောက်ပဲ ထည့်ပြီး အသီးအရွက်ကြော်တွေ ပါအောင် မြည်းစေချင်ပါတယ်။ အသီးအရွက်ကြော်တွေဟာ ဆီကြော်မုန့်တွေထက်တော့ ကယ်လိုရီနည်းပါတယ်။ အသီးအရွက်သုပ်တွေကို အစားထိုးနိုင်ရင်တော့ အကောင်းဆုံး ဖြစ်ပါတယ်။

ပန်းဂေါ်ဖီ အစိမ်းနဲ့ ချောကလက်တို့ရဲ့ အဆီနဲ့ ကယ်လိုရီပမာဏချင်း နှိုင်းယှဉ်ပြထားတဲ့ ပုံပါ

ပြီးတော့ သီဟိုဠ်စေ့လို အဆန်မျိုးတွေနဲ့ တွဲမြည်းရင် သွေးကြောတွေ အသည်းတွေကို အယ်လ်ကိုဟောဒဏ်ကြောင့် ပျက်စီးခြင်းမှ ခံနိုင်အောင် ကာကွယ်ပေးနိုင်ပါတယ်။
တကယ်တန်ဖိုးရှိတဲ့ အချက်တစ်ခု ပြောပြရရင် အရက်ဘီယာ တစ်ခုခု သောက်ခါနီးမှာ နျုရိုဘီယမ်အပြာ၊ အင်နာဗွန်စီ တို့လို Vitamin B Complex ပါတဲ့ အားဆေးတစ်ခုခု ကြိုသောက်ခြင်းဟာလည်း အသည်းခြောက်ခြင်းကို တစ်ဖက်တစ်လမ်းက ထိထိရောက်ရောက် ကာကွယ်နိုင်တာ သေချာပါတယ်။

အရက်ကို အသည်းထဲမှာ အဆိပ်မဖြစ်အောင် ဖျက်ဖို့ ခန္ဓာကိုယ်က B1 လိုပါတယ်။ အရက်နဲ့ မျက်နှာသစ်ပြီး နေ့နေ့ညည သောက်နေတဲ့ သူတွေ၊ ဒါမှမဟုတ် နည်းနည်းသောက်ပေမယ့် နေ့စဉ်မှန်မှန် သောက်သူတွေမှာ B1 ချို့တဲ့နေမှာ သေချာပါတယ်။ B1 တွေ မရှိတော့ရင် အသည်းက ဖြစ်ရာ ရရာ နည်းတွေနဲ့ အယ်လ်ကိုဟောကို ချေဖျက်ပါတယ်။ ဒီအခါမှာ အသည်းထိပါတယ်။ ကြာလာရင် အသည်းအဆီ စဖုံးလာကာ အသည်းကြီးလာပါတယ်။ အသည်းရောင်သွားလို့ပါ။
နောက်ကြာလာရင်တော့ အသည်းက မကြီးတော့ဘဲ ကျုံ့ကျုံ့လာပါတယ်။ အသည်းခြောက်ခြင်းဟာ အဲသလို ဖြစ်ရတာ ဖြစ်ရတာ ဖြစ်ပါတယ်။

ဒီတော့ B1 လုံးဝ ချို့တဲ့မနေဘူး ဆိုရင် အသည်းခြောက်ခြင်း အန္တရာယ် ရာခိုင်နှုန်းများစွာ လျော့ကျသွားမှာ သေချာပါတယ်။ ဆေးကျောင်းသား ဘ၀ကနေ အခုအထိ ၀ိုင်းဖွဲ့နေကျ ကျွန်တော်တို့ သူငယ်ချင်းတွေဆို အင်နာဗွန်စီလေးတွေ မသောက်ခင် ကြိုသောက်ကြပါတယ်။ ကောင်းရော……..Tongue out

ယောက်ျားလေးနဲ့ မိန်းကလေးတွေဟာ အရွယ်မရောက်ခင် အထိတော့ အဆီစုပုံချင်း တူကြပေမယ့် အရွယ်ရောက်ပြီးရင်တော့ မတူတော့ပါဘူး။ အမျိုးသမီးတွေကျတော့ ကယ်လိုရီတွေဟာ အဆီအဖြစ် လက်မောင်း၊ ပေါင် နဲ့ တင်ပါးတွေမှာ အများဆုံး သွားစုကြပြီး ဗိုက်မှာတော့ စုတာ နည်းသွားပါတယ်။ အမျိုးသားတွေကျတော့ လက်မောင်း၊ ပေါင် နဲ့ တင်ပါးတွေမှာ အဆီတွေ သိပ်မရှိလို့ နောက်လာတဲ့ အဆီတွေက အဲနေရာတွေကို မသွားတော့ဘဲ ဗိုက်မှာ အများဆုံး စုကြတာ ဖြစ်ပါတယ်။

ဘီယာဗိုက်ဟာ အသက်ကြီးရင်လည်း ပိုထင်ရှားလာပါတယ်။ အကြောင်းရင်းတွေက အသက်ကြီးလာသူတွေရဲ့ ခန္ဓာကိုယ်က ကယ်လိုရီ လိုအပ်မှု နည်းလာလို့၊ အပင်ပန်းမခံနိုင်တော့တဲ့ အတွက် လှုပ်ရှားမှု နည်းလာလို့ ဖြစ်ပါတယ်။

အမျိုးသားကော အမျိုးသမီးတွေမှာပါ အသက်လေးရလာတာနဲ့ မျိုးပွားဟော်မုန်း ပမာဏကလည်း လျော့နည်း ကျဆင်းလာပါတယ်။ ဒါကြောင့် ခန္ဓာကိုယ်အလယ်ပိုင်း (ခါး) မှာ အဆီစုလာကြတာ ဖြစ်ပါတယ်။ ဆေးလိပ်သောက်သူတွေဟာလည်း ခါးမှာ အဆီစုဖို့ နီးစပ်တယ်လို့ ကျန်းမာရေး ပညာရှင်များက ဆိုပါတယ်။

ဘီယာဗိုက် ရှိရင် ဘာအန္တရာယ်တွေ ဖြစ်နိုင်သလဲ
မကောင်းတဲ့ အချက်တွေဟာ အလှအပ ပျက်ပါတယ်၊ ဘောင်းဘီတွေ မတော်တော့ပါဘူး ဆိုတဲ့ အချက်တွေ ထက် ပိုပါတယ်။ ဆီးချိုအမျိုးအစား အမှတ် ၂၊ သွေးတိုးနဲ့ နှလုံးသွေးကြောပိတ်ခြင်း ဆိုင်ရာ ရောဂါများ တိတိကျကျကို ဖြစ်စေနိုင်ပါတယ်။

ဝတာချင်း တူရင်တောင် ဗိုက်ရွှဲတဲ့ သူတွေက ပေါင်တွေ တင်ပါးတွေမှာ ၀တဲ့ သူတွေထက် အန္တရာယ် ပိုများပါတယ်။ ဘာလို့လဲဆိုတော့ သင့်ရဲ့ ဗိုက်ပေါ်မှာ အဆီတွေ အများကြီး စုနေတယ် ဆိုရင် ၀မ်းဗိုက်ထဲက ကလီစာတွေ ပတ်ပတ်လည်မှာပါ အဆီတွေ ဖုံးနေတယ်ဆိုတာ ညွှန်ပြနေတာ ဖြစ်ပါတယ်။ ဒါဟာ အန္တရာယ် ကြီးပါတယ်။

ကလီစာတွေ ဘယ်လောက်အထိ အဆီဖုံးနေသလဲ ဆိုတာကို ခါးအ၀န်း (waist circumference) တိုင်းတာခြင်းဖြင့် ခန့်မှန်းနိုင်ပါတယ်။ ခါးအ၀န်းဟာ အမျိုးသမီးတွေမှာ ၃၅ လက်မ၊ အမျိုးသားတွေမှာ လက်မ ၄၀ ထက်ကျော်မယ် ဆိုရင် နှလုံးရောဂါ၊ သွေးတိုး၊ ဆီးချို စတာတွေ ဖြစ်ပြီး သက်တမ်းကို တိုးစေတဲ့ သက်ရောက်မှု ရှိစေပါတယ်။ ဒါကြောင့် သင့်ရဲ့ကျန်းမာရေးအတွက် သင့်ရဲ့ ခါးဆိုက်ကို ဒီလက်မတွေထက် မကျော်အောင် ထိန်းထားသင့်ပါတယ်။

ဗိုက်ရွှဲခါးတုတ်ခြင်းကို ဘယ်လို လျှော့မလဲ
ဗိုက်ရွှဲခါးတုတ်ခြင်းကို လျှော့ချဖို့ ကယ်လိုရီ လျှော့စားဖို့နဲ့ ကိုယ်လက်လှုပ်ရှားမှု လုပ်ပေးဖို့ ကလွဲရင် မှော်တန်ခိုးဆန်ဆန် နည်းလမ်းတွေ လုံးဝ မရှိပါဘူး။ ဗိုက်အဆီတွေကိုပဲ ရွေးချပေးတဲ့ အဆီချဆေးလည်း မရှိသလို အပြင်ကနေ ဆေးလိမ်း၊ စုပ်ထုတ်၊ အပူပေးတဲ့ နည်းတွေမှာလည်း ဆိုင်ရာ ဆိုးကျိုးတွေ ရှိနေပါတယ်။ တ်ိရိ စ္ဆာန်အဆီ (ဥပမာ ၀က်ဆီ၊၀က်ခေါက်) တွေဟာ စားလိုက်ရင် ဗိုက်ခေါက်ထဲကို တိုက်ရိုက်တန်းဝင်တာကို စမ်းသပ်တွေ့ရှိထားရလို့ ဒါတွေကိုတော့ ဗိုက်ကျချင်ရင် ရှောင်ကြပါ။

အရက်နဲ့ ဘီယာ ယှဉ်ရင်တောင် ဘီယာက ပိုဗိုက်ရွှဲစေတာ အားလုံးသိမှာပါ။ ဘာလို့လဲ ဆိုတော့ အကြောင်းရင်းက ၂ ချက်ရှိပါတယ်။ သိတဲ့အတိုင်းပဲ ဘီယာသောက်ရင် ရေချိန်ရောက်အောင် များများ သောက်ရတော့ ကယ်လိုရီ အဆမတန် ရစေပါတယ်။ နောက်ပြီး ဘီယာထဲမှာ တစေးပမာဏ အများအပြား ပါဝင်ပါတယ်။ တစေးတွေနဲ့ ပုံမှန်ထိတွေ့နေတဲ့ အတွက်ကြောင့် အူတွေ ကလီစာတွေဟာ ကြီးထွားလာခြင်း (Organomegaly) ရလာစေပါတယ်။ ဒီနှစ်ချက်ကြောင့် ဘီယာဗိုက် ဖြစ်လာစေတာ ဖြစ်ပါတယ်။

ဘယ်လိုပဲဖြစ်ဖြစ် အယ်လ်ကိုဟော ဆိုရင်တော့ အလွန်အကျွံ မသောက်မိဖို့ အရေးကြီးပါတယ်။ အရက်ကို ဘ၀နဲ့ ချီပြီး မက်ခဲ့လို့ ဘ၀နဲ့ချီပြီး ပျက်ခဲ့ရသူတွေ၊ ဝေဒနာမျိုးစုံ ရုပ်ပျက်ဆင်းပျက် ခံစားနေရသူတွေ ရှိနေတာကို မယုံရင် ဆေးရုံတွေမှာ သွားကြည့်ကြပါ။ (ဒီလူတွေထဲမှာ အသိဥာဏ် ပညာအဆင့်အတန်း နည်းတဲ့ အခြေခံ လူတန်းစားတွေ ပါသလို ပြည့်စုံကြွယ်ဝတဲ့ ပညာရှင်လူတန်းစားတွေလည်း ပါတာပဲ ဖြစ်ပါတယ်။ ဒါပေမယ့် သူတို့ဟာ အရက်နဲ့ ပတ်သက်ရင်တော့ ပညာသားပါပါ မဆင်ခြင်စွာ သောက်သုံးခဲ့ကြလို့ ဖြစ်တယ်ဆိုတာ ရောဂါရာဇ၀င်ယူခြင်း (History Taking) လုပ်ကြည့်သမျှ တွေ့ရှိခဲ့ရပါတယ်။ ဒါကြောင့် ဘ၀နဲ့ချီပြီး ထိခိုက်လောက်အောင်တော့ အလွန်အကျွံ မသောက်မိဖို့ အရေးကြီးပါတယ်။


ကျွန်တော် ဒီစကားကို ဘာလို့ အထပ်ထပ် ပြောနေရသလဲ ဆိုရင် ဆေးရုံကို ရောက်လာတဲ့ အမျိုးသားလူနာ ၄ ယောက်မှာ တစ်ယောက်လောက်ဟာ အရက်ရဲ့ ဆိုးကျိုး နောက်ဆက်တွဲ ရောဂါ တစ်ခုခု ရှိနေတာ လက်တွေ့ တွေ့နေရလို့ပါ။ မိသားစုအတွက် နိုင်ငံ့အတွက် အားကိုးအားထား ပြုရမယ့် ကိုယ်စွမ်းဥာဏ်စွမ်း အမြင့်အမားဆုံး အရွယ် သုံးဆယ်ကျော် လေးဆယ်ပိုင်းတွေဟာ ဆေးရုံကုတင်တွေပေါ်မှာ သေကောင်ပေါင်းလဲ လဲလျောင်းနေကြရတာ မိသားစုနဲ့ နိုင်ငံအတွက် ဆိုးရွားစွာ ထိခိုက်ရုံမက ထိုသူတွေအတွက်လည်း ဘ၀ရဲ့ အရည်အသွေး (Quality of Life) လျော့ကျစေပါတယ်။

ဒီတော့ တတ်နိုင်သမျှ လျှော့သောက်ပါ။ သောက်ရင်လည်း အပေါ်မှာ ပြောခဲ့တဲ့ အချက်တွေကို လိုက်နာပါ။ ၀မ်းဗိုက်လျော့ကျစေမယ့် လေ့ကျင့်ခန်းတွေ လုပ်ပါ။ တခြား ဘယ်အရာကိုမှ မငဲ့ရင်တောင် သင့်ကိုယ်သင်နဲ့ သင့်မိသားစုကို ငဲ့ပါလို့ ပရိသတ်များ ကောင်းကျိုးကို ရည်မျှော်ကာ တင်ပြပေး လိုက်ပါတယ်။

Admin
Admin

Posts : 82
Join date : 2011-06-11
Age : 26
Location : Mandalay

View user profile http://mmts.forumsmusic.com

Back to top Go down

View previous topic View next topic Back to top


 
Permissions in this forum:
You cannot reply to topics in this forum